Ungir Grindvíkingar standa fyrir góðgerðarviku
Styrkja fjölskyldu Ölmu Þallar
Grunnskólanemar í Grindavík ætla að láta gott af sér leiða með því að halda sérstaka góðgerðarviku frá 20. til 24. febrúar n.k.. Allur ágóði af viðburðum vikunnar mun renna til fjölskyldu Ölmu Þallar Ólafsdóttur sem lést í bílslysi á Grindavíkurvegi í byrjun árs.
Til stendur að halda veglega tónleika í kirkjunni þar sem fjöldi listamanna kemur fram. Þeirra á meðal eru Pétur Jesú og Hófí. Svo mætir Tómas úr Voice þáttunum og svo auðvitað jólastjarnan Guðrún Lilja úr Grindavík.
Haldið verður ball fyrir nemendur 8. til 10. bekkjar þar sem heimamaðurinn Björn Valur sér um stemninguna.
„Við vorum búin að ákveða að halda góðgerðarviku og þá lá beinast við að styrkja fjölskyldu Ölmu,“ segir Veigar Gauti Bjarkason formaður nemendafélagins í Grindavíkurskóla. Einnig ætla krakkarnir að halda kökubasar og bingó þar sem veglegir vinningar eru í boði. Landsliðsfyrirliðinn úr fótboltanum Aron Einar leggur til áritaðan búning líkt og Kolbeinn Sigþórsson. Körfuboltamaðurinn Martin Hermannsson leggur einnig til treyju. Líka er hægt að vinna sér inn fjórhjólaferð og hótelgistingu.
Tónleikarnir eru á þriðjudegi og hefjast klukkan 20:00 en þar ræður fólk hvað það borgar inn. Allir eru velkomnir á þessa viðburði.
