Starfsemi félagsmiðstöðva fyrsta skrefið í átt að velferð ungmenna

„Svona ferðir skipta gríðarlega miklu máli. Ísland er sér á parti og það er margt mikilvægt starf í gangi annars staðar í Evrópu og það er ekki síður mikilvægt að við sjáum það betur,“ segir Ólafur Bergur Ólafsson. Ólafur er starfsmaður Fjörheima og verkefnisstjóri vettvangsheimsóknar sem starfsmannahópur félagsmiðstöðva á Suðurnesjum fór í á dögunum. Hópurinn ferðaðist um Pirkanmaa-héraðið í Finnlandi og fékk að kynnast ungmennastarfi á svæðinu. 

Starfsmenn Samsuð héldu í vettvangsheimsóknina fyrr í október á vegum Erasmus+, sem hvetur til samstarfs milli landa í Evrópusambandinu. Samsuð eru Samtök félagsmiðstöðva á Suðurnesjum, samstarf félagsmiðstöðvanna hefur verið til staðar í gegnum árin en nú var haldið til Finnlands til að auka þekkingu starfsmanna Samsuð og búa til vettvang fyrir frekara samstarf milli félagsmiðstöðvanna á Suðurnesjum. Þá var tilgangurinn einnig að opna á tækifæri fyrir frekara samstarf milli Suðurnesja og Pirkanmaa-héraðsins þegar kemur að málum ungmenna. Ólafur segir heimsóknir eins og þessa vera einkar mikilvægar enda sé hægt að læra mikið í nýju umhverfi.

Hvað var á dagskrá fyrir ykkur í heimsókninni?

„Við fengum fyrirlestra og kynningar um allskonar starfsemi og úrræði fyrir börn og ungmenni á Tampere-svæðinu. Við erum búin að vera að skoða hvað Finnarnir eru að gera gott og hvað við á Suðurnesjum getum gert betur. Þá sérstaklega fyrir félagslega einangraða og innflytjendahópinn, sem er mjög stór á Suðurnesjum miðað við önnur svæði.“

Hvert var aðalmarkmið ferðarinnar?

„Aðalmarkmiðið var að sjá hvað við getum nýtt okkur á Suðurnesjum og hvar við getum bætt okkur í samstarfi við önnur sveitarfélög eða aðrar stofnanir innan Suðurnesja. Tilgangurinn var líka að hópurinn kynnist aðeins betur og að geta opnað á tækifæri að vinna meira saman náinni framtíð.“

Hvers vegna eru svona ferðir mikilvægar fyrir ykkur sem starfsmenn?

„Svona ferðir skipta gríðarlega miklu máli. Við sóttum sjálf um styrk á vegum Erasmus fyrir ferðinni og það er heilmikið lærdómsferli í því. Það er líka mikilvægt að sjá hvað aðrir eru að gera, Ísland er ekki sér á parti og það er margt mikilvægt starf í gangi annars staðar í Evrópu og það er ekki síður mikilvægt að við sjáum það betur.“

Hver er helsti munurinn á starfinu í Finnlandi og heima að þínu mati?

„Ég held að helsti munurinn sé sá að finnska samfélagið tekur þessu starfi alvarlega og starfið er þeim mjög mikilvægt og inngróið í það hvernig samfélagið virkar. Á sama tíma held ég að íslenski almenningurinn sé ekki alveg búinn að kveikja á hversu mikilvæg þessi starfsemi er fyrir börn og ungmenni. Það er eitthvað sem við þurfum að vera betri í og láta heyra í okkur til að láta fólk vita hvað þetta er mikilvægt. Þetta starf skiptir máli því starfsemi félagsmiðstöðva er í raun fyrsta skrefið í átt að velferð ungmenna hér í Finnlandi. Þannig þetta er gríðarlega mikilvægt og mörg tækifæri í boði fyrir okkur.“

Blaðamaður Víkurfrétta talaði einnig við þau Ellen Lind Ísaksdóttur, starfsmann félagsmiðstöðvarinnar í Vogum, og Elmar Þór Þórisson, starfsmann félagsmiðstöðvarinnar í Reykjanesbæ. Þau segja þónokkurn mun vera á starfinu heima og úti.

„Eitt sem ég tók sérstaklega eftir er munurinn á starfi fyrir eldri en sextán ára, hjá þeim er miklu meira í gangi fyrir sextán til 29 ára. Starfsemin er mjög góð hjá þeim, þau eru mikið í því að reyna að koma fólki inn á vinnumarkaðinn og í nám. Þau hafa samband við alla sem detta úr skóla, hætta í vinnu eða eru ekki í neinum kerfum. Það er fundið þá aðila og reynt að koma þeim inn í skipulagt starf,“ segir Elmar og Ellen bætir við: „Það er haldið rosalega utan um þá sem detta út úr skólakerfinu og eru atvinnulausir, þeir reka eftir því að þeir geri eitthvað og halda þeim í raun af götunni.“

Aðspurð hvað ferðin gerði fyrir starfsmennina sem hóp segir Ellen: „Þetta opnaði augu okkar fyrir því hvað það er mikið sem hægt er að gera, sama hvort það sé í lítilli félagsmiðstöð eða stórum eins og við höfum séð í Finnlandi. Þetta stækkaði svolítið hugann fyrir möguleikum.“ Elmar tekur undir með henni og bætir við: „Þetta var líka gott upp á að kynnast starfsmönnum hinna félagsmiðstöðvanna. Ég til dæmis þekkti Ellen ekki neitt fyrir þetta en nú er ég búinn að eignast góðan vin.“

Ýtarlegt sjónvarpsviðtal við starfsmenn félagsmiðstöðva á Suðurnesjum og fulltrúa alþjóðamála hjá Marttinen má sjá hér að neðan