Selló og hörputónleikar í Útskálakirkju
Sunnudaginn 26.ágúst kl. 17 verða haldnir tónleikar í Útskálakirkju í Garði. Gunnar Kvaran sellóleikari og Elísabet Waage hörpuleikari munu leika þar tónleika undir yfirskriftinni: Melankólía í melódíum og fjörugir dansar. Á efnisskránni er barokktónlist og rómantík ásamt draumkenndum sýnum í tónsmíð sem samin var sérstaklega fyrir dúóið. Flutt verður tónlist eftir m.a. Couperin, John Speight, Sigfús Einarsson, Saint-Saëns og Granados. Dökkur og safaríkur sellótónninn og bjartir hörpuhljómarnir blandast sérlega ljúflega.
Gunnar og Elísabet hafa starfað saman um langa hríð. Efnisskrá þeirra hefur teygst frá barokktímanum til dagsins í dag. Þau hafa haldið tónleika víða um land s.s. á höfuðborgarsvæðinu, í Borgarnesi og Vestmannaeyjum, á Þingeyrum og Seyðisfirði. Árið 2004 gaf Zonet útgáfan út geisladisk þeirra. Þar má finna ýmsar perlur, m.a. Schubert Arpeggione sónötuna og Svaninn eftir Saint-Saëns.
