Reykjanesbær á tvö sigurlið í Allir lesa

Þúsundir landsmanna tóku þátt í svokölluðum landsleik í lestri sem kallast Allir lesa, þar á meðal fjöldi Suðurnesjamanna. Tvö sigurlið í keppninni koma einmitt frá Reykjanesbæ. Skvísurnar (lið í Akurskóla í Reykjanesbæ) sigraði í flokki liða með 3-9 liðsmenn, en þær lásu að meðaltali í 2 sólarhringa, 2 klst. og 1 mínútu. 5. ÍH Myllubakkaskóli sigraði í flokki liða með 30-50 liðsmenn og las að meðaltali í 1 sólarhring, 1 klst. og 41 mínútu.

Fyrir fjórum vikum hleyptu Miðstöð íslenskra bókmennta og Reykjavík Bókmenntaborg UNESCO af stokkunum landsleik í lestri á nýjum lestrarvef, allirlesa.is – og er hann sá fyrsti sinnar tegundar í heiminum. Á degi íslenskrar tungu, lauk landsleiknum, þar sem hópar af öllum stærðum og gerðum lásu til sigurs. Á keppnistímanum hafa hrannast inn spennandi tölur um lestur þátttakenda í Allir lesa, og hér neðar er það helsta tíundað.

• Á fjórum vikum skráðu 4.236 einstaklingar í 326 liðum lestur upp á um 70.000 klukkustundir.
• Heildarlesturinn samsvarar um átta árum af samfelldum lestri.
• Íslandsmeistarar í lestri lásu í yfir 5 sólarhringa að meðaltali á keppnistímanum.
• Tvö sigurlið koma úr Reykjanesbæ.
• Vestmannaeyingar lásu mest allra sveitarfélaga.
• Konur lásu þrisvar sinnum meira en karlar.
• Börn undir 15 ára lásu langmest.