Rennblautir slökkviliðsmenn í dansi með yngismeyjum
Það vakti eftirtekt vegfarenda við slökkviliðsstöðina í Reykjanesbæ í gær að þar voru slökkviliðsmenn í liprum dansi við ungar fagrar meyjar. Þegar betur var að gáð þá voru þarna á ferðinni nemendur við Fjölbrautaskóla Suðurnesja sem voru að taka upp tónlistarmyndband fyrir lokaþátt Hnísunnar í ár sem frumsýndur verður annað kvöld í Sambíóunum í Reykjanesbæ.
Sífellt meira hefur verið lagt í netþátt þeirra NFS-inga á síðustu árum og spilar þátturinn stóra rullu í félagslífi skólans. Mikið var lagt í tónlistarmyndbandið í gær og létu krakkarnir ekki muna sig um að láta sprauta yfir sig ísköldu vatni við upptökur á myndbandinu. Þau voru að vonum fegin þegar tökum lauk enda vatnið bæði ískalt og kalt í veðri.
Víkurfréttir verður með skemmtilegt innslag í vefsjónvarpi vf.is á morgun þar sem sjá má krakkana í dansi.
Þrátt fyrir að nemendurnir væru blautir og kaldir þá stilltu þeir sér upp í myndtöku fyrir Víkurfréttir.
Þessar ungu stúlkur dönsuðu í ískaldri vatnsgusu og brostu.
