Páll Óskar troðfyllti Hljómahöll

Páll Óskar Hjálmtýsson troðfyllti Rokksafn Íslands í Hljómahöll á sunnudag þegar hann opnaði sýningu sína „Páll Óskar - einkasafn poppstjörnu“. Opnun sýningarinnar hafði verið frestað um sólarhring þar sem það gustaði hraustlega um landsmenn á laugardeginum. Þá um kvöldið mætti Páll Óskar hins vegar í Stapann og hélt þar alvöru Pallaball fyrir fullu húsi.

Við opnunina á einkasýningu poppstjörnunnar sagði Páll Óskar stuttlega frá því hvernig sýningin varð til og Tómas Young, framkvæmdastjóri Rokksafns Íslands greindi frá því hvernig bílfarmar af sýningarmunum hafi verið sóttir á heimili Páls Óskars og í geymsluhúsnæði.

Páll Óskar flutti svo tvö lög fyrir gesti og gaf sér svo góðan tíma í myndatökur með gerstum sýningarinnar. Á sunnudagskvöld lék Páll Óskar svo af fingrum fram ásamt Jóni Ólafssyni í Stapanum á tveggja tíma tónleikum þar sem farið var yfir ferilinn en Páll Óskar fagnaði 45 ára afmæli nú sl. mánudag.

Meðfylgjandi myndir voru teknar á Rokksafninu á sunnudaginn. Nánar í Víkurfréttum á fimmtudag.

Fjölmargir gestir mættu á opnun einkasýningar Páls Óskars.

Björn Björnsson hönnuður sýningarinnar og Kjartan Már Kjartansson bæjarstjóri skála fyrir sýningunni.

Hér að neðan er svo innslag Sjónvarps Víkurfrétta um Pál Óskar.