Leita að ellefu íbúum

„Við erum enn að reyna að finna út hverjir þessir ellefu voru sem skráðir eru í íbúaskrár eftir að herinn fór. Einhver taldi sig hafa fundið fjölskylduna þegar hann arkaði fram á uppábúna og mjög Kanalega íbúð á svæðinu. Enn það reyndist vera „íbúð Kanans“ sem er hluti af merku nýju sýningarverkefni sem er íbúð sem er gerð upp með húsgögnum, myndaalbúmum og heimilisbúnaði, eins og þar sé enn búið,“ sagði Árni Sigfússon, bæjarstjóri Reykjanesbæjar, á íbúafundi í Holtaskóla í gær. Þetta kemur fram á vef Reykjanesbæjar.

Árið 1990 voru tæplega 5000 íbúar á því svæði sem í dag heitir Ásbrú. Þetta voru hermenn og fjölskyldur þeirra á Varnarstöðinni í Keflavík. Þegar herinn hvarf á braut í lok árs 2006 voru íbúarnir um 2800 en töldust samtals 11 þegar herinn var allur á burt.

Á aðeins 7 árum hefur byggst upp tæplega 2000 manna byggð á Ásbrú. „Að öllum líkindum eitt stærsta skóla- og nýsköpunarþorp landsins. Langflestir eru skólanemar og fjölskyldur þeirra. Það má sannarlega segja að þar hafi tekist að smíða plógjárn úr sverðunum,“ sagði Árni ennfremur. 

Séð yfir Ásbrúarsvæðið.