Kjötsúpa mettaði 5000 manns

Skólamatur mettaði 14.000 manns síðasta föstudag. Þar af voru 5000 gestir Ljósanætur í Reykjanesbæ og 9000 grunnskólanemendur á Suðurnesjum og höfuðborgarsvæðinu.

Hefð er komin á það að Skólamatur bjóði gestum Ljósanætur upp á matarmikla kjötsúpu á föstudagskvöldinu á Ljósanótt í samstarfi við Goða. Súpuveislan hefur aldrei verið stærri en nú en sex flutningabíla þurfti til að flytja kjötsúpuna í lögreglufylgd niður að smábátahöfninni þar sem veislunni var slegið upp í tengslum við bryggjutónleika sem þar voru haldnir.

Meðfylgjandi myndir voru teknar í veislunni. Nánar verður fjallað um kjötsúpuna sem Skólamatur matreiðir í Sjónvarpi Víkurfrétta á fimmtudaginn. Þar verður einnig fjölmörgum öðrum viðburðum Ljósanætur gerð skil í tali, tónum og litríkum myndum.