Jólamenning Sossu

Reglulegur liður í menningunni í Reykjanesbæ fyrir undanfarin jól hefur verið jólasýning Sossu myndlistarkonu. Hún sýndi afrakstur síðustu mánaða og var einnig með eldri málverk.

Sossa hefur í mörg ár kryddað jólasýningu sína með meiri menningu og fengið gesti.

Guðrún Vera Hjartardóttir var gestur á vinnustofunni á þessari sýningu og sýndi skúlptúr. Þá sungu og spiluðu Magga Stína og Tómas Jónsson og einnig Daníel Hjálmtýsson sem kennir í Sandgerði. Þau skiptu með sér sýningardögum.

Fastur jólagestur hefur í áratug verið Anton Helgi Jónsson sem hefur lesið úr ljóðum sínum en gann gaf fyrst út ljóðabók árið 1974. Sossa hefur oft notað ljóðin hans sem innspýtingu og hugmyndir að myndverkum.

„Jólasýningin mín er svona þakkarframtak til viðskiptavina minna. Það er gaman að geta boðið þeim í léttar veitingar og nýjar myndir á aðventunni,“ sagði Sossa sem fyrst hélt jólasýningu fyrir um þrjátíu árum síðan. Hennar undirskrift er á mjög mörgum veggjum heimila á Suðurnesjum.