Hollur millibiti

Dagleg vellíðan, orka og úthald byggir að miklu leyti á því hvaða fæðu við setjum ofan í okkur. Mataræðið hefur mun meiri áhrif en okkur grunar og er mjög stór þáttur í heilsufari okkar. Næringarrík fæða getur m.a. stuðlað að bættum svefni, skýrari hugsun, betra skapi og aukinni afkastagetu yfir daginn. Að snarla á hollum millibitum heldur blóðsykrinum í jafnvægi og gefur okkur jafna orku til að takast á við verkefni dagsins. Einnig erum við að koma í veg fyrir slæmar ákvarðanir í fæðuvali ef við pössum okkur að borða reglulega yfir daginn. Hér eru nokkrar hugmyndir að hollum millibitum sem hægt er að grípa í með lítilli fyrirhöfn heima fyrir eða í vinnunni.

Epli með lífrænu hnetusmjöri.
Grísk jógúrt með bláberjum.
Þurrkaðir ávextir og hnetur.
Sellerístöngar með lífrænu möndlusmjöri.
Ferskar grænar sykurbaunir.
Hrökkbrauð með kotasælu og papriku.
Gulrætur og hnúðkál í strimlum dýft í hummus.
Kókósflögur, goji ber og kasjúhnetur.
Kirsuberjatómatar, soðið egg
Möndlur, rúsínur, söl.

Heilsukveðja,
Ásdís grasalæknir.