Hjartavernd á búningum Reynis í stað Landsbankans

Knattspyrnudeild Reynis Sandgerðis og Landsbankinn hafa gert með sér samstarfssamning um stuðning bankans við allar deildir félagsins næstu árin.

Samhliða því hefur Landsbankinn afsalað sér auglýsingum á búningum hjá Reyni og boðið félaginu að velja sér í staðinn gott málefni á búningana. Reynir valdi Hjartavernd. Merki félagsins prýðir því búninga félagsins næstu ár.

Landsbankinn kynnti síðastliðið haust nýja stefnu í stuðningi bankans við íþróttafélög undir yfirskriftinni Samfélag í nýjan búning. Markmiðið er að tengja saman stuðning bankans við íþróttir og mannúðarmál. Reynir Sandgerði er fimmtánda félagið sem gengur í samstarf við Landsbankann um Samfélag í nýjan búning.

Stofnaður verður áheitasjóður fyrir Hjartavernd og greiðir bankinn ákveðna upphæð fyrir hvern sigur meistaraflokka Reynis karla og kvenna á Íslandsmótum í knattspyrnu. Öðrum fyrirtækjum og einstaklingum er frjálst að heita á liðið sitt og leggja þannig góðu málefni lið. Í tilefni af stofnun áheitasjóðsins mun Landsbankinn styrkja Hjartavernd með styrk að upphæð  500.000 krónur.

„Við erum mjög stolt af stuðningi okkar við Reyni. Hugmyndafræði bankans að baki verkefninu Samfélag í nýjan búning snýst um að tengja saman íþróttafélög og samtök eða félög sem láta að sér kveða í mannúðarmálum,“ segir Einar Hannesson, útibússtjóri Landsbankans í Reykjanesbæ. „Með þessum hætti geta íþróttafélögin og stuðningsmenn þeirra eða aðrir styrktaraðilar tekið þátt í því með Landsbankanum að styðja við mannúðarmál.“

Fyrirmyndir verkefnisins
Verkefnið Samfélag í nýjan búning á sér fyrirmyndir. Í tengslum við Landsbankadeild karla og kvenna stóð Landsbankinn fyrir verkefninu Skorað fyrir gott málefni á árunum 2006-2007. Bankinn greiddi þá ákveðna upphæð fyrir hvert mark sem liðin skoruðu í tilteknum umferðum Landsbankadeildarinnar og rann hún til málefna sem félögin völdu sér. Markmiðið var þá eins og nú að tengja saman stuðning við íþróttir og mannúðarmál. Landsbankinn sækir einnig innblástur í framtak meistaraflokks kvenna í Aftureldingu sem síðustu þrjú ár hefur vakið athygli á árvekniátakinu Bleiku slaufunni með því að hafa hana framan á búningum liðsins.

Mynd: Frá undirritun samstarfssamnings Reynis Sandgerði og Landsbankans.