Hjálpræðisherinn gaf 100.000 kr. í Velferðarsjóð

Foringjar í Hjálpræðishernum komu færandi hendi með framlag í Velferðarsjóðinn, nú á þriðja degi jóla. Hermenn Hjálpræðishersins og sjálfboðaliðar hafa staðið víða um borg og bý á aðventunni og safnað frjálsum framlögum. Hluti söfnunarinnar rennur í Velferðarsjóðinn, eða kr. 100 þúsund. Á myndinni eru þau Wouter og Ester van Gooswilligen ásamt börnum sínum með sóknarprestinum, sr. Skúla þar sem þau afhenda þessa myndarlegu gjöf.

Mikill hugur hefur verið í fólki og samtökum á Suðurnesjum í aðdraganda jólanna og hafa fjölmargir komið í kirkjuna með gjafir sínar og framlög. Ástæða er til þess að þakka þetta framlag af heilum hug enda nýtist það vel þeim sem minna mega sín í samfélagi okkar, segir í tilkynningu frá Velferðarsjóði Suðurnesja.