Helgin mín: Nýtur lífsins í Berlín

Hanna Rúna Kristínardóttir er 26 ára Keflvíkingur sem býr í Berlín um þessar mundir. Hún nemur sálfræði í fjarnámi við Háskólann á Akureyri. Hún starfaði hjá Kaffitár í Reykjanesbæ um árabil en ætlunin var alltaf að ganga menntaveginn að sögn Hönnu. Hún ákvað að skrá sig í fjarnám samhliða vinnu. Í sumar greindist Hanna með óreglulegan hjartslátt og ákvað þess vegna að minnka álagið í sínu lífi. Hana langaði að breyta til. Góður vinur hennar var að flytja til Berlínar þegar hún ákvað í skyndi að gera slíkt hið saman og hætta í vinnunni og einbeita sér þess í stað að náminu að fullu. Henni líður vel í Berlínarborg og getur vel hugsað sér að dvelja þar til lengri tíma. Blaðamaður Víkurfrétta hafði samband við Hönnu og spurði hana hvað væri á döfinni um helgina hjá henni. Nóg er í boði í höfuðborg Þýkalands og Hanna nýtir sér það til hins ítrasta.

Hanna ætlar að byrja helgina á því að heilsa upp á þau í sendiráði Íslands í Berlín á föstudaginn og taka þar próf í skólanum. „Ætli ég verðlauni mig svo ekki með góðri uppáhellingu af Hátíðakaffinu frá Kaffitári sem ég fékk sent til mín á dögunum, bretti upp ermarnar og haldi áfram í próflestrinum. Svo þarf ég eflaust að undirbúa flutningana aðeins, en ég er að skipta um íbúð um mánaðarmótin. Á laugardagskvöldið ætla ég að skella mér í matarboð hjá íslenskri skvísu sem er að bjóða heim til sín nokkrum íslenskum stelpum búsettum í borginni,“ segir Hanna.

Hvernig er frábær helgi í þínum augum?
„Að brjóta upp rútínuna, að fá mér góðan kaffibolla á uppáhalds kaffihúsinu mínu, Chapter One, myndi gleðja mitt kaffihjarta mikið, og ég hef það sem svona „spari.” Fullkomin helgi hjá mér fellst í því að standa upp frá lærdómnum, dressa mig upp, skoða mannlífið hér í borginni og taka myndir af öllu mögulegu skemmtilegu sem verður á vegi mínum. Að versla í matinn fyrir helgina er líka lúmskt spennandi því hér eru margir spennandi markaðir. Að fara á skype-deit með fjölskyldunni eða vinum gefur mér mikið. Svo er fátt notalegra en að enda helgina á persónulegum og rólegum sunnudegi og dunda sér með sjálfum sér og undirbúa skólavikuna, fara í gegnum myndirnar sem ég hef tekið síðustu vikuna, lesa heimspekibækur og liggja með tærnar upp í loftið.“

Er eitthvað sérstakt sem þú leyfir þér um helgar?
„Góð helgi byrjar oft á því að setjast niður eftir morgunmatinn og skoða uppskriftir á netinu, gönguferð á markaðina og matvöruverslunina hér í hverfinu og töfra eitthvað spennandi í eldhúsinu um kvöldið. Framandi matur er mér ofarlega í huga um helgar, ég er svolítill matgæðingur. Ég setti mér markmið um að hlaupa maraþon fyrir svolitlu síðan, svo að ég skokka á virkum dögum en mér finnst voða gott að taka mér frí um helgar og fara í sparigallann, vera menningarleg og sýna mig og sjá aðra. Bíóið hér í hverfinu er líka mjög spennandi og það er svona hluti af helgarsportinu. Það er svo skemmtilegt hvað þetta er allt saman skipulagt hjá Þjóðverjunum, maður þarf helst að panta miða í bíóið og er úthlutað ákveðið sæti. Svo bjóða þeir upp á „Love seat“ en það er svona sæti þar sem pör geta látið fara betur um sig í bíóinu því það er ekki armur á milli þeirra, mér finnst það mjög krúttlegt.“