Hádegistónleikar Tónlistarfélags Reykjanesbæjar

Tónlistarfélag Reykjanesbæjar dembir sér í aðventutónleikavertíðina og býður upp á dýrindis hádegistónleika á morgun, föstudaginn 5. desember í Bergi, Hljómahöll. Leikin verða ljúf jólalög af strengjakvartettnum Stilltur.

 

Strengjakvartettinn Stilltur er skipaður þeim Sigrúnu Harðardóttur og Margrét Soffíu Einarsdóttur fiðluleikurum, Þórunni Harðardóttur víólu og Grétu Rún Snorradóttur selló. Allar eru þær meðlimir í kammerhópnum Stillu sem hefur getið sér góðan orðstír í flutningi verka fyrir strengi og söng.

Kvartettinn hefur á síðustu misserum sinnt margvíslegum tónlistarflutningi við fjölbreyttar aðstæður og leggur metnað sinn í að flytja tónlist frá mismunandi tímabilum og stefnum. Auk þess að starfa við tónlistarflutning hafa flestir meðlimir hópsins einnig atvinnu af tónlistarskennslu og eru þær Þórunn og Gréta Rún kennarar við Tónlistarskóla Reykjanesbæjar

 

Boðið verður upp á léttar veitingar að tónleikum loknum.  Nánari upplýsingar hér.