Föstudagur 5. febrúar 1999 kl. 21:28
GUÐMUND Í EFSTA SÆTIÐ
Það er mikilvægt í fyrsta prófkjöri nýrrar sameinaðrar hreyfingar jafnaðarmanna og félagshyggjufólks, að vel takist til við skipan hins nýja lista Samfylkingarinnar hér í Reykjaneskjördæmi. Prófkjörið sem fram fer 5.og 6.febrúar næstkomandi og er öllum stuðningsmönnum opið, mun ráða því hvernig forystusveit okkar mun líta út í kosningabaráttunni í vor. Fjölmargt gott fólk er að finna í hópi frambjóðenda, sem eru 19 talsins. Það skiptir miklu máli hvernig forystu verður háttað á listanum. Guðmundur Árni Stefánsson alþingismaður er mjög vel til forystu fallinn og er það mín skoðun að hann sómi sér vel í 1.sæti listans. Hann er baráttumaður bæði í sókn og vörn og þótt ungur sé að árum, hefur hann margháttaða reynslu í meðvindi sem mótvindi, í stjórnmálum og lífinu almennt. Ég minni líka á, að Guðmundur Árni reyndist okkur betri en enginn þann stutta tíma sem hann gegndi störfum heilbrigðisráðherra. Beinn stuðningur hans og handfastur við byggingu D- álmu var meiri og raunverulegri en flestra annarra og almennt naut heilbrigðisþjónustan hér suður frá atorku hans og velvilja. Samfylking jafnaðarmanna í Reykjaneskjördæmi verður í góðum höndum undir forystu Guðmundar Árna. Kristmundur Ásmundsson yfirlæknir og bæjarfulltrúi.
