Gott gengi FS í ræðu- og spurningakeppnum

Lið Fjölbrautaskóla Suðurnesja í MORFÍS, mælsku- og rökræðukeppni framhaldsskólanna, hefur farið á kostum í vetur og er komið í fjögurra liða úrslit keppninnar, segir á vef skólans.

 

Fyrr í vetur vannst sigur á Menntaskólanum á Egilsstöðum á útivelli og síðan lá lið Fjölbrautaskólans í Garðabæ í 8 liða úrslitum nú á dögunum.  Sú keppni fór fram á okkar heimavelli að viðstöddu fjölmenni og var keppnin æsispennandi.  Umræðuefnið var ameríski draumurinn og var okkar lið með en Garðbæingar á móti.  Svo fór að lokum að tveir dómarar af þremur dæmdu okkar mönnum sigur en auk þess var Sigfús Jóhann Árnason valinn ræðumaður kvöldsins.  Auk hans skipa liðið þeir Fannar Óli Ólafsson, Davíð Már Gunnarsson og Oddur Gunnarsson liðsstjóri. 

Þá mætir lið skólans liði Menntaskólans í Hamrahlíð í 8 liða úrslitum Gettu betur. Keppnin fer fram í Sjónvarpinu laugardaginn 21. febrúar.