Gáfu spjaldtölvur og heyrnartól til Víðihlíðar
Slysavarnadeildin Þórkatla færði nýlega íbúum hjúkrunardeildar Víðihlíðar spjaldtölvur og heyrnartól.
Strangt til tekið er ekki um slysavarnir og verkefni þeim tengt að ræða, en það er ákveðin vörn í því að sjá til þess að stytta fólki stundir andlega og félagslega þegar þörf er á. Þar sem samkomubann ríkir núna í þjóðfélaginu eru heimsóknir ekki leyfðar á Víðihlíð og íbúar þar geta því ekki hitt ættingja og ástvini. Þá getur tæknin komið til bjargar meðan þetta tímabundna ástand varir.
Þórkötlur ákváðu að gefa bæjarbúum kost á að gefa með í söfnunina og tóku nokkrir þeirra þátt, kann slysavarnadeildin þeim bestu þakkir fyrir framlagið, segir á grindavik.is.
Guðrún Kristín Einarsdóttir formaður og Sigrún Stefánsdóttir stjórnarkona Þórkötlu fóru og afhentu íbúum gjöfina. Þeir sem vilja leggja slysavarnadeildinni lið í þessari söfnun eða bara almennt geta lagt framlag sitt inn á reikning 0143-05-2521, kennitala 560190-2049.
