Fréttir af félagsstarfi eldri borgara

Mánudaginn 2. apríl var haldið billiardmót í Ballskákfélagi eldri borgara í Reykjanesbæ. Yfir 20 þátttakendur tóku þátt og háðu harða keppni. Leikar fóru á þann veg að Karl Þorsteinsson sigraði Jósep Valgeirsson í mögnuðum úrslitaleik. Í þriðja sæti hafnaði Valdimar Axelsson. Ballskákklúbburinn kemur saman á mánudags og fimmtudagsmorgnum í Virkjun. Til gamans má geta að klúbburinn safnaði sjálfur fyrir billiardborðunum með aðstoð góðra fyrirtækja á svæðinu sem og með styrk frá Íþrótta- og tómstundaráði Reykjanesbæjar.

Miðvikudaginn 4. apríl fór fram Boccia mót eldri borgara í Íþróttahúsinu að Ásbrú. Mótið var mjög vel sótt. Keppt var í fjórum fimm manna riðlum. Í undanúrslitum léku Björn Maronsson, Guðbrandur Valtýsson, Ísleifur Guðleifsson og Jóhann Alexandersson. Að lokum var það svo Guðbrandur Valtýsson sem sigraði Ísleif Guðleifsson í úrslitum.

Dagana 13. - 14. apríl munu þátttakendur frá Reykjanesbæ halda til Siglufjarðar til að taka þátt í Íslandsmóti félags áhugafólks um íþróttir aldraðra. Þar eigum við titil að verja en eins og kunnugt er þá vann lið Reykjanesbæjar titilinn í Borgarnesi á síðasta ári. Lið Reykjanesbæjar var skipað þeim Hákoni Þorvaldssyni, Marinó Haraldssyni og Ísleifi Guðleifssyni.

Félagsstarf aldraðra er samstarfsverkefni Íþrótta- og tómstundasviðs, Fjölskyldu- og félagsþjónustunnar og Félags eldri borgara.

Kær páskakveðja, Hafþór Birgisson tómstundafulltrúi