Eltir sólina á fellihýsinu

Víkurfréttir spurðu Suðurnesjamenn út í áform þeirra um verslunarmannahelgina en fólk er ýmist á leið á útihátíðir með vinunum, í sumarbústað með fjölskyldunni eða slaka á heima við og njóta kyrrðarinnar.

Ágústa Guðný Árnadóttir er 26 ára Garðbúi sem vinnur í fæðubótaversluninni og booztbarnum Líkama og Lífstíl sem staðsett er í Sporthúsinu á Ásbrú.

Hvað á að gera um verslunarmannahelgina og hvert á að fara? Ég mæti í ræktinna með kallinum og skelli mér svo í óvissuna, með fellihýsið í för og frábært vinafólk, ekkert ákveðið en það verður elt sólina!

Er einhver verslunarmannahelgi sem er eftirminnilegri en aðrar hjá þér? Eina verslunarmannahelgina fórum við nokkur saman á Húsafell. Þegar við komum á tjaldsvæðið kom tjaldvörðurinn og skipaði okkur að fara í burtu, því þetta væri fjölskylduskemmtun og enginn vilji fyrir því að hafa unglinga á svæðinu. Þar sem við vorum búin að keyra alla þessa leið vildum við ekki fara til baka og því endaði það þannig að við fengum leyfi að tjalda í einum sumarbústaðargarðinum sem bróðir mannsins míns og kona hans eiga. Þar var mikið fjör en síðan kom hellidemba og tjöldin fóru á flot og öllum varð skítkalt. Við enduðum á því að færa okkur öll inn í útihúsið fyrir utan bústaðinn. Þar var þröngt í búi en mun skárra en að liggja á ískaldri blautri jörð. Einnig á ég góðar minningar frá ferðalögum með fjölskyldunni þegar ég var lítil, mér fannst skemmtilegast að fara til Akureyrar þar sem ég var alsæl að komast í jólahúsið og í Kjarnaskóg.

Hvað finnst þér einkenna góða verlsunarmannahelgi og finnst þér eitthvað vera ómissandi um þessa helgi? Góður félagskapur með fjölskyldu og vinum, góða skapið og góð tónlist klikkar seint.