Dáleidd á dansgólfi Kaffibarsins - LadieLex gefur út ábreiðu af laginu 'Silence'

LadieLex, indie rokk/popp tónlistarverkefni Alexöndru Óskar Sigurðardóttur, hefur nýlega gefið út lagið „Silence“ sem er einnig hennar fyrsta ábreiða. Lagið er upphaflega samið af kanadísku rafhljómsveitinni Delerium ásamt kanadísku söngkonunni og meðhöfundinum Sarah McLachlan. LadieLex skilar rokkaðri útfærslu með popp blæbrigðum.

Alexandra á sér langa sögu í íslensku tónlistarlífi þar sem hún var lengi vel meðlimur í rokkhljómsveitinni Hellvar (gítar og bakraddir). Eftir að hafa flutt til Svíþjóðar árið 2014 og aðlagaðist nýju lífi í nýju landi byrjaði hún að leggja grunn að nýju sólóverkefni og varð þá LadieLex til.  Hún hefur verið sérstaklega virk undanfarið og gaf út sína fyrstu EP plötu í júlí 2023 sem fékk góðar undirtektir bæði á Íslandi og útí heimi.

Í síðustu heimsókn sinni á Íslandi eyddi Alexandra nokkrum kvöldstundum á dansgólfi Kaffibarsins. Það var þar sem hún heyrði fyrst remixuðu útgáfuna af laginu „Silence“ eftir Dj Kryder. Lagið festi rætur sínar um leið og þá sérstaklega dáleiðandi söngur Sarah McLachlan. Þegar hún sneri aftur heim til Svíþjóðar gat hún ekki beðið eftir að gera sína eigin útgáfu.

LadieLex tók upp og framleiddi lagið á eigin spýtur en það var hljóðblandað af Christopher Göthberg hjá Sonika Sudio og masterað af Johan Åkerström hjá Cosmos Mastering, báðir eru þeir búsettir í Svíþjóð.