Brýtur niður múra og bætir heiminn!

Listahátíð sem á erindi við okkur öll, líka þá sem halda að hún sé bara fyrir hina.

Sveitarfélögin á Suðurnesjum og MSS taka nú þátt í listahátíðinni List án landamæra í 5. sinn með 4 spennandi viðburðum sem íbúar eru eindregið hvattir til að taka þátt í og njóta.

Dagskráin hefst í næstu viku á sumardaginn fyrsta með opnun samsýningar í Bíósal Duushúsa þar sem leiðir saman hesta sína fólk úr ólíkum áttum með fjölbreyttri myndlist.

Á síðasta ári stóðu félagar í Björginni og fleiri fyrir Geðveiku kaffihúsi í Svarta pakkhúsinu sem sló heldur betur í gegn með trufluðum veitingum og fjölbreyttum uppákomum. Nú ætla þau að endurtaka leikinn og eru allir hvattir til að fylgjast með viðburðum þar.

Strætóskýli í bænum munu einnig fá nokkra andlitslyftingu sem vonandi lyftir einnig geðinu okkar og léttir okkar lund. Þá láta Bestu vinir í bænum sitt ekki eftir liggja og hafa nú í annað sinn sett saman nýja sýningu, Tímavélina, í Frumleikhúsinu, sem enginn má láta framhjá sér fara. Ef þú misstir af þeim síðast skaltu ekki láta það gerast aftur.

Fylgist með dagskrá í næstu Víkurfréttum og á vef og Facebook Reykjanesbæjar.

Lífið er yndislegt!

Dagskráin er styrkt af Menningarsjóði Suðurnesja