„Biblíumyndirnar mínar”: Trúarleg verk eftir Sossu á sýningu í Reykjanesbæ

stendur yfir sýning á nýjum olíverkum eftir Sossu í Kirkjulundi, safnaðarheimili Keflavíkurkirkju. Um er að ræða 7 stór verk, öll máluð á þessu ári og er myndefnið sótt í biblíusögurnar.

Aðspurð um tilurð myndanna sagði Sossa: „Þegar ég var lítil stúlka í Keflavík fór ég yfirleitt í barnamessu á sunnudögum, enda dóttir prestsins og alin upp í guðsótta og trú. Við lok messu fengum við krakkarnir litlar biblíumyndir og ef einhver var svo heppinn að hafa átt afmæli í vikunni, voru myndirnar tvær – og þá ekki eins. Ég safnaði þessum myndum og átti mínar uppáhaldsmyndir. Þegar upp kom sú hugmynd að ég sýndi verk mín í Kirkjulundi rifjuðust upp fyrir mér ýmis þau mótíf sem myndirnar höfðu að geyma og ekki síst þær hugsanir sem kviknuðu. Mér fannst tilvalið og við hæfi að setja myndefnið í þann raunveruleika og umhverfi sem ég ólst upp við, enda myndirnar og sögurnar jafn raunverulegar lítilli stelpu og leikvöllurinn og fjaran sem ég lék mér í. - Þessi sjö verk eru biblíumyndirnar mínar.”

Sýningin er opin alla daga og mun standa fram á haust. Aðgangur er ókeypis og eru allir hvattir til að koma og njóta þessara skemmtilegu verka.