Algjör útilegukelling

Gunnhildur Vilbergsdóttir

 

Hvert á að fara um verslunarmannahelgina í ár?

Við verðum fjölskyldan annaðhvort í sveitinni hjá mömmu og pabba eða í útilegu í góðra vina hópi. Ég er allavega ekki týpan til að vera heima hjá mér um verslunarmannahelgina.

 

Með hverjum á að fara?

Húsbandinu og börnunum og svo ræðst restin.

 

Lætur þú veðurspá ráða því hvert á að fara um verslunarmannahelgina?

Já, veðrið finnst mér skipta mjög miklu máli í útilegu svo hægt sé að njóta útiverunnar. Svo er ég líka með sólarsýki á háu stigi.

 

Hvert hefur þú farið um verslunarmannahelgi síðustu ár?

Við höfum gjarnan verið í sveitinni hjá mömmu og pabba eða með góðum vinum á ferðalagi. Engin sérstök hefð fyrir því hvað við gerum um verslunarmannahelgina en ég er allavega aldrei heima.

 

Hvert hefur þú farið í ferðalög í sumar?

Í sumar erum við búin að eltast við fótboltamótin hjá strákunum okkar og fara í góða útilegu austur á Kirkjubæjarklaustri með vinum. Svo fór ég í hestaferð með foreldrum mínum auk 20 hestamanna þar sem riðið var um Rangárvelli og inní Landssveit.

 

Hvernig ferðalög ertu að stunda? Ferðu í sumarbústað eða í ferðavagna?

Ég er algjör útilegukelling. Finnst langskemmtilegast að vera í ferðavagni með fjölskyldunni og skemmtilegu fólki þar sem notið er náttúrunnar og samveru. En svo finnst mér líka æðislegt að fara til sólarlanda.

 

Hefur þú verið heppin með veður á ferðalögum þínum í sumar?

Já við höfum verið verulega heppin í öllum okkar ferðalögum í sumar en ef maður ætlar að ferðast á Íslandi þá þarf maður líka bara að hafa jákvætt hugarfar.