Alfa námskeið í Garðinum

Miðvikudaginn 19. janúar kl. 20 verður Alfa-námskeið haldið í safnaðarheimilinu Sæborg í Garði og hefst það með sérstöku kynningarkvöldi. Námskeiðinu verður síðan framhaldið á miðvikudagskvöldum og stendur í 10 vikur. Þetta er fjórða árið sem Alfa- námskeið eru haldin hér í prestakallinu og hefur þátttaka verið sérstaklega góð. Þátttaka á kynningarkvöldinu felur ekki í sér skuldbindingu um að sækja námskeiðið sjálft.

Alfa eru skemmtileg og lifandi námskeið um kristna trú. Námskeiðin byggjast upp á sameiginlegri máltíð, fyrirlestri, umræðum og stuttri samveru. Þau henta vel fyrir þá sem vilja kynna sér kristindóminn og heilaga ritningu á skemmtilegan og áhrifaríkan hátt. Alfa er fyrsti stafurinn í gríska stafrófinu og er námskeiðið um undirstöðuatriði kristinnar trúar. Reynt er að hafa námskeiðið í notalegu og afslöppuðu umhverfi.

Alfa námskeið eru nú haldin í flestum kristnum kirkjudeildum í yfir 130 löndum um allan heim. Alfa hefur vakið verðuga athygli og hafa nokkrar milljónir manna sótt námskeiðin frá upphafi.