Ala upp æðarunga

Vinkonurnar Ása, Æsa og Rósmarý í Njarðvík urðu fyrir óvæntri en skemmtilegri reynslu á sunnudaginn.

Þær höfðu fundið egg í móanum á Nikelsvæðinu og fóru með það heim til einnar stelpunnar. Þar klaktist það út á sunnudaginn og út stökk hraustur og hress æðarungi sem hefur fengið nafnið Andrés, alla vegana um tíma.

Andrés er hinn frískasti, borðar brauð hjá „mömmunum“ sínum og syndir í lítilli tjörn sem er í garðinum sem er heima hjá Ásu.

Þær vinkonur segja að hann sé líka mjög þægur en hann er með pínu læti á nóttinni því hann vill ekki sofa í kasssanum sínum á nóttinni. Stúlkurnar hyggjast ala Andrés upp þangað til að hann verður stór. Foreldrum þeirra finnst þetta bara skemmtilegt og styðja ungamömmurnar með ráðum og dáð.

VF-mynd/Þorgils – 1: Æsa, Rósmarý og Ása með Andrés. 2: Andrés á sundi í tjörninni sinni.