Aðstandendur U.S.S.S.S. flestir Suðurnesjamenn

Kvikmyndin U.S.S.S.S. var frumsýnd fyrir helgi í Háskólabíói en aðstandendur myndarinnar eru flestir Suðurnesjamenn. Leikstjóri U.S.S.S.S. er Eiríkur Leifsson og stærstu hlutverkin eru í höndum Davíðs Guðbrandssonar og Jóns Marinós Sigurðssonar, sem leika félagana Rebba og Sæla. Undirtitill myndarinnar er "Ekkert sérstaklega rómantísk gamanmynd" enda er hér á ferðinni kolsvört kómedía.U.S.S.S.S. gerist á einum degi í Reykjavík og segir sögu aðalpersónanna tveggja, iðjuleysingjans Rebba, sem ákveður að ræna kaupmanninn á horninu og Sæla, eiganda safnaraverslunar, sem heldur hlífðarskyldi yfir Rebba og flækist óvart inn í flókna atburðarás.
Kostnaðurinn við gerð myndarinnar var í algjöru lágmarki enda unnin í sjálfboðavinnu.

Það gekk á ýmsu þegar unnið var að gerð myndarinnar. Meðfylgjandi frétt birtist í Víkurfréttum í tenglsum vð töku myndarinnar:

31.7.2000 13:29:00
Leikari handtekinn fyrir „vopnað“ rán
Lögreglan í Reykjanesbæ var kölluð út sl. laugardagskvöld um hálf ellefu leytið, þar sem tilkynnt var um að vopnað rán stæði yfir á bensínstöðinni Fitjaborg í Njarðvík.
Tilkynnandi kom fullur geðshræringar á lögreglustöðina og kvað grímuklæddan mann ógna starfsfólki stöðvarinnar með dúkahnífi og brást lögreglan því skjótt við og mætti á vettvang í snarhasti. Glæpamaðurinn var „meisaður“ og handtekinn í hvelli, en þá kom í ljós að hann var leikari að leika í stuttmynd. Eitthvað hafði aðstandendum stuttmyndarinnar láðst að láta lögreglu staðarins vita um fyrirætlanir sínar með þeim afleiðingum að leikarinn þurfti að eyða því sem eftir var kvöldsins á heilsugæslustöðinni þar sem „meisúðinn“ var skolaður úr vitum hans. Enn er ekki ljóst hvort athæfi stuttmyndagerðarmannanna verði kært, en ljóst er að þeir brutu lög um tilkynningarskyldu til lögreglu.