Víðismenn í vandræðum
Víðir - Elliði 0:4
Það gengur hvorki né rekur hjá Víðismönnum þessa dagana, þeir töpuðu illa í gær þegar þeir léku heimaleik gegn Elliða í 3. deild karla í knattspyrnu.
Víðir, sem féll úr 2. deild í fyrra, hefur gengið bölvanlega í Íslandsmótinu í ár en liðið hefur nú ekki unnið leik síðan í lok maí og situr fyrir neðan miðja deild.
Reynir - Magni 2:2
Reynir hefur verið á góðri siglingu í 2. deild karla en Reynismaskínan hökti lítillega um helgina þegar Magni frá Grenivík kom í heimsókn.
Magnús Magnússon kom Reynismönnum á bragðið með marki á fjórðu mínútu en Magni jafnaði leikinn skömmu síðar (15'). Magnús var aftur á ferðinni á 36. mínútu og höfðu Reynismenn eins marks forystu í hálfleik (2:1).
Snemma í seinni hálfleik fækkaði í hópnum hjá Reyni þegar Magnús Sverrir Þorsteinsson fékk að líta sitt annað gula spjald og þar með rautt (57').
Það leit allt út fyrir að Reynir ætlaði að sigla sigrinum heim en á þriðju mínútu uppbótartíma jöfnuðu Magnamenn.
Reynismenn halda toppsætinu en KV er jafnt þeim að stigum.
