Víðir í Evrópukeppni

Víðir úr Garði verður fulltrúi Íslands í Evrópukeppninni í Futsal, eða innanhússknattspyrnu, sem hefst með undankeppni í ágúst. Víðir leikur í 2. deild karla.

 

Gengið var frá umsókn Víðismanna fyrir skemmstu, en þeir unnu sér rétt til þátttöku með því að lenda í öðru sæti í Íslandsmótinu í futsal í vetur. Meistarar Vals ákváðu að vera ekki með að þessu sinni sökum anna á öðrum vígstöðvum og var Garðmönnum því boðið að taka þátt.

 

Þar sem Ísland er að taka þátt í fyrsta skiptið þá fara þeir sjálfkrafa í forkeppni sem leikin verður á tímabilinu 9. - 17. ágúst.  Dregið verður í riðla 2. júlí næstkomandi í höfuðstöðvum UEFA og þá mun einnig koma í ljós hvar verður leikið en leikið er í fjögurra liða riðlum.

Núverandi Evrópumeistarar eru Ekaterinburg frá Rússlandi en þeir sigruðu Murcia frá Spáni í úrslitaleik í apríl en leikið var í Moskvu.

 

Fyrsta Evrópukeppnin var haldin árið 2001 en keppnin hefur vaxið ár frá ári í takt við vaxandi vinsældir Futsal.