Video: Keflavík mistókst að tryggja sér titlinn

Keflvíkingum mistókst að tryggja sér Íslandsmeistaratitilinn eftir að hafa beðið ósigur gegn bikarmeisturum FH í Landsbankadeild karla í kvöld. Fyrir leik liðanna dugði Keflvíkingum jantefli til að tryggja sér Íslandsmeistaratitilinn, en ekki tókst að innbyrða hann að þessu sinni.

FH byrjaði betur í leiknum og var Tryggvi Guðmundsson ekki langt frá því að koma heimamönnum yfir strax í upphafi leiks. Guðjón Árni Antoníusson tókst hins vegar að bjarga Keflvíkingum. Liðin sóttu á víxl eftir þetta án þess þó að skapa sér nein teljandi færi.

Fyrsta alvöru færi gestanna úr Keflvík leit dagsins ljós á 20. mínútu þegar Patrik Redo komst einn í gegnum vörn FH. Hann renndi boltanum hins vegar naumlega framhjá úr algjöru dauðafæri. Við þetta kviknaði meira líf í Keflvíkingum sem sóttu meira en heimamenn og voru oft á tíðum nálægt því að koma sér í góð markfæri. Fjölmargir áhorfendur þurftu hins vegar að sætta sig við markalausan fyrri hálfleik.

Seinni hálfleikurinn bauð upp á mikla veislu. FH sótti án afláts í byrjun seinni hálfleiks og uppskar gott mark á 58. mínútu. Eftir hornspyrnu rataði boltinn til Ásgeirs Gunnars Ásgeirssonar sem lét vaða á markið og boltinn saug í netinu við mikinn fögnuð heimamanna.

Keflvíkingar virtust slegnir út af laginu við markið því FH hélt áfram að sækja, en þeir dökkklæddu úr Bíltabænum áttu í miklum erfiðleikum með að halda boltanum á milli sín. Það var í samkvæmt gangi leiksins þegar að Atli Viðar Björnsson kom FH í 2-0 á 68. mínútu. Hann fékk boltann við vítateigslínu Keflvíkur og skot hans fór af varnarmanni Keflavíkur og í netið. Staðan orðin vænleg fyrir heimamenn og fátt sem benti til þess að Keflvíkingar væru að fara að ná stigi í Kaplakrikanum.

Kristján Guðmundsson, þjálfari Keflavíkur, var ekki lengi að gera breytingar á sínu liði eftir seinna mark FH. Hann setti inn Magnús Sverri Þorsteinsson, sem var ekki lengi að stimpla sig inn í leikinn. Við innkomu hans færðist aukið líf í sóknarleik Keflvíkinga og hann minnkaði munninn fyrir Keflvíkinga á 77. mínútu með góðu skoti eftir að boltinn hrökk til hans.

Magnús var ekki hættur því fjórum mínútum síðar sólaði hann sig í gegnum varnarmenn FH og jafnaði leikinn með góðu marki. Allt ætlaði um koll að keyra hjá stuðningsmönnum Keflvíkur enda titilinn í augnsýn. FH setti við jöfnunarmark Keflavíkur, allt kapp á sóknarleikinn og voru Keflvíkingar hvað eftir annað stálheppnir að fá ekki á sig mark. Keflvíkingar fengu hins vegar ekki að fagna Íslandsmeistaratitlinum í kvöld því Atli Viðar Björnsson skoraði sigurmark heimamanna í uppbótartíma eftir góða sendingu frá Tryggva Guðmundssyni.

Gríðarlegt svekkelsi fyrir gestina úr Keflavík sem höfðu komist aftur inn í tapaðan leik. Keflvíkingar eiga erfiðan heimaleik gegn Fram í lokaumferðinni um næstu helgi. FH er hins vegar fimm stigum á eftir Keflavík og eiga enn eftir að leika tvo leiki. FH þarf að vinna báða sína leiki til að eiga möguleika á titlinum og treysta á að Keflavík misstígi sig gegn Fram á heimavelli.

Staðan í Landsbankadeildinni

VF-MYNDIR/JJK

Sjá einnig video í Vefsjónvarpi Víkurfrétta hér á vf.is