„Við erum hundfúlir að ná ekki lengra,“ segir Guðjón Skúlason

„Við höfðum bara ekki úthald í varnarleikinn og misstum af þeim,“ sagði Guðjón Skúlason, þjálfari Keflavíkur, eftir tapið gegn KR í kvöld í oddaleik undanúrslita Iceland Express deildar karla í körfuknattleik í DHL höllinni. Lokatölur voru 105-89 KR í vil og Keflvíkingar eru því komnir í sumarfrí.

„Við komum okkur í góða stöðu eftir fyrsta leikhluta en dettum svo í þá gryfju að fara klára hlutina óskynsamlega sóknarlega og fáum á okkur hraðaupphlaup í kjölfarið. Þetta er eitthvað sem við vissum en hvað getur maður sagt. Þetta er það sem maður öskrar og biður menn um að hafa í huga en ef þetta síast ekki inn að þá er erfitt að fara breyta því þegar komið er í leikinn,“ sagði Guðjón.

Keflvíkingar byrjuðu sterkir og áttu góða forystu eftir fyrsta fjórðung en þá var staðan 23-30 fyrir Keflavík. Keflvíkingar náðu svo mest tíu stiga forskoti þegar lítið var liðið af öðrum fjórðungi.

KR-ingar duttu þá í gang og Keflvíkingar sáu ekki til sólar eftir það. Staðan í hálfleik var 55-42 fyrir KR og munurinn aðeins jókst eftir það. Thomas Sanders var svo rekinn úr húsi þegar um 3 mínútur voru eftir af leiknum og Keflvíkingar búnir að gefast upp. Loka tölur 105-86.

Stigahæstir hjá Keflavík í kvöld voru Thomas Sanders með 27 stig og 7 fráköst, Andrija Ciric með 19 stig, Sigurður Gunnar Þorsteinsson með 18 stig og 9 fráköst, Hörður Axel Vilhjálmsson með 13 stig og 7 stoðsendingar og Gunnar Einarsson með 12 stig.

Myndasafn frá leiknum kemur inn á vefinn á morgun.

[email protected]

Keflvíkingar með vonleysið uppmálað þegar um þrjár mínútur eru eftir af leiknum.