VefTV - Sverrir Þór: Lokakaflinn virkilega dapur

Sverrir Þór Sverrisson, þjálfari Grindavíkur, og Sigurður Gunnar Þorsteinsson, leikmaður Grindavíkur, voru skiljanlega svekktir eftir tap gegn Stjörnunni í kvöld, 89-101. Þar með er Grindavík 1-2 undir í einvíginu um Íslandsmeistaratitilinn og verður að vinna næstu tvo leiki til að verja titilinn.

„Ég er hundsvekktur að við skyldum ekki klára þennan leik af fullum krafti. Við vorum að spila vel lengst af í leiknum. Varnarlega vorum við ekki nógu sterkir og vorum að fá á okkur of mörg stig,“ sagði Sverrir Þór í leikslok. Þrátt fyrir að útlitið sé nú svart fyrir Grindvíkinga þá er Sverrir alls ekki tilbúinn að leggja árar í bát.

„Við fáum séns í Garðabænum, ætlum að vinna þar og fá oddaleik. Það er erfitt að vinna Stjörnuna en við gerum það á fimmtudag.“

Nánar má heyra í þeim Sverri og Sigurði í myndabandinu hér að ofan.

Sigurður Þorsteinsson og félagar hans í Grindavík fá einn séns í viðbót í Ásgarði á fimmtudag.