Ungt júdófólk úr Njarðvík stóð sig vel á Íslandsmeistaramóti
- Heiðrún Fjóla í 3. sæti í opnum flokki
Njarðvíkingum gekk vel á Íslandsmeistaramóti fullorðinna í júdó sem fram fór um helgina. Mótið var firnasterkt og mætti allt besta júdófólk landsins til leiks.
Meðalaldur liðs Njarðvíkur á mótinu var 18 ár og vann það til fimm verðlauna. Heiðrún Fjóla varð önnur í -78kg flokki kvenna, Ægir Már Baldvinsson varð annar í -60kg flokki karla, Bjarni Darri Sigfússon varð þriðji í -73kg flokki karla og Gunnar Gustav Logason varð annar í +100kg flokki karla.
Í opnum flokki kvenna er keppt óháð þyngd og má segja að sigurvegarar í þeim flokkum séu bestu júdómenn landsins. Heiðrún Fjóla gerði sér lítið fyrir og varð þriðja í þeim flokki.
Í tilkynningu frá júdódeild Njarðvíkur segir að árangurinn sé sögulegur því að aldrei hafi jafn margir júdómenn úr Njarðvík unnið til verðlauna á Íslandsmeistaramóti fullorðinna.
Guðmundur Gunnarsson þjálfari Njarðvíkur á spjalli við Bjarna Darra.
Bjarni Darri á verðlaunapalli.
Ægir Már að keppa í úrslitum.
