Ungir kylfingar úr GS æfa við frábærar aðstæður á Spáni

Ungir kylfingar í Golfklúbbi Suðurnesja hafa dvalið við golfæfingar á Costa Ballena golfsvæðinu á Spáni þessa vikuna. Erla Þorsteinsdóttir, íþróttastóri GS og golfkennari hefur stýrt æfingum og leik ungmennana við frábærar aðstæður.

„Þetta hefur gengið vel og krakkarnir eru í skýjunum enda eru aðstæður hér eins og þær gerast bestar. Við höfum æft og spilað golf allan daginn og notið þess að dvelja hér,“ sagði Erla.

Þetta er í fyrsta sinn í mörg ár sem ungmennahópur á vegum Golfklúbbs Suðurnesja fer til æfinga en undirbúningur fyrir ferðina hefur staðið yfir allt síðastliðið ár. Sautján kylfingar á aldrinum 11 til 19 ára eru í hópnum og hefur allt gengið mjög vel. „Þetta er bara æði að vera hérna og geta gengið út á golfsvæðið frá hótelinu,“ sögðu krakkarnir.

Á efri myndinni má sjá yngri hópinn hjá GS en á þeirri neðri eru þau eldri. Hér að neðan má sjá Erlu Þorsteinsdóttur á æfingasvæðinu með krökkunum. VF-myndir/Páll Ket.