Ungir afreksmenn á Toyotamóti

Laugardaginn 30. apríl fór fram Toyota-mót 8. flokks í knattspyrnu í Reykjaneshöllinni. Þar voru ungir knattspyrnusnillingar á ferð, 4-6 ára. Þetta var stór dagur hjá krökkunum, enda fyrsta mótið hjá
allflestum keppendum. Aldrei áður hefur mót fyrir þennan aldursflokk verið haldið á vegum knattspyrnudeildar Keflavíkur og því um tilraun að ræða.

Mótið tókst mjög vel og voru keppendur sem og allir þeir sem komu við í Höllinni mjög ánægðir með mótið. Leikgleðin leyndi sér ekki og skipti hjá mörgum engu máli í hvort markið var skorað!! Í mótinu voru leiknir 42 leikir (leiktími 1 x 6 mín.) og í þeim voru skoruð 140 mörk sem gerir 3,33 mörk að meðaltali í leik, frábær árangur það. Úrslit leikja voru ekki skráð og þ.a.l. engir sigurvegarar krýndir, sigurvegarar dagsins voru þeir sem tóku þátt. Þátttökufélög í mótinu voru Keflavík með 5 lið, FH með 4 lið, ÍR með 3 lið og Þróttur Reykjavík með 3 lið og var heildarfjöldi keppenda 130.

Fjöldi manns mætti í Höllina til að fylgjast með ungu snillingunum og má áætla að heildarfjöldinn hafi verið um 300-400 manns. Í mótslok fengu allir þátttakendur verðlaunapening og gómsæta pizzu frá Ingó á Langbest. Það er næsta víst, af þessu móti að dæma, að mót fyrir þennan aldurshóp eru komin til að vera.