Tyson-Thomas vill verða Íslendingur

Carmen Tyson-Thomas, bandarískur leikmaður Njarðvíkur í Dominos deild kvenna í körfubolta ætlar að sækja um íslenskan ríkisborgararétt og segist telja niður dagana þar til hún getur sótt um í viðtali við karfan.is.

Tyson-Thomas kom fyrst til Íslands árið 2014 og spilaði þá með liði Keflavíkur. Árið eftir það spilaði hún með Njarðvík í 1. deildinni og er því á sínu þriðja ári hér á landi og spilar með Njarðvík. Tyson-Thomas er búin að leika frábærlega með Njarðvíkingum það sem af er deildarkeppninnar en hún er með tæp 39 stig að meðaltali í leik, 16 fráköst og 5 stoðsendingar.

Carmen segir ennfremur að það væri heiður fyrir hana að fá að spila með landsliði Íslands ef til þess kæmi og spila með öllum þeim bestu á landinu og fyrir landið sem hún elskar.