Týndi sonurinn snýr aftur í Keflavíkursigri

Lítið sem ekkert hefur losnað um hreðjatak Keflavíkur á KR og það kom bersýnilega í ljós í kvöld þegar Bikarmeistarar Keflavíkur fóru með öll stigin af hólmi í Vesturbænum í Landsbankadeild karla í knattspyrnu. Guðmundur Steinarsson kom Keflavík í 1-0 eftir vítaspyrnu og Símun Samuelsen bætti öðru markinu við. Björgólfur Takefusa minnkaði muninn í 2-1 fyrir KR og þar við sat. Óskabyrjun Keflavíkur í höfn og týndi sonurinn Ingvi Rafn Guðmundsson lék sinn fyrsta leik fyrir Keflavík síðan snemma sumars 2005 og var honum fagnað vel og innilega þegar hann kom inn á í liði Keflavíkur fyrir Símun Samuelsen.

 

,,Þetta var ótrúlega ljúft og ennþá betra að fá að koma inn á í sigurleik gegn KR. Stjáni var búinn að nefna það við mig að ég gæti komið inn á og hann setti mig inn þegar um 10 mínútur voru eftir og leyfði mér aðeins að smakka,” sagði Ingvi Rafn. ,,Mér leið ótrúlega vel og það er ólýsanlega gaman að vera kominn aftur á völlinn. Ég er örlítið aumur í ökklanum en maður harkar af sér til að fá að spila, það gera allir,” sagði Ingvi kátur í leikslok. ,,Það er svolítið í það að ég komist í byrjunarliðið því ég er ekki kominn í almennilegt form.”

Ingva var vel fagnað bæði af áhangendum Keflavíkur og KR þegar hann kom inn á leikvöllinn en Ingvi sagðist nú mest lítið hafa spáð í stúkunni. ,,Þetta voru vissulega hlýjar móttökur og það gerir þetta bara ennþá sætara,” sagði Ingvi.

 

Leikurinn sjálfur fór nokkuð rólega af stað en KR hafði undirtökin og byggðu upp þokkalegar sóknir. Sigmundur Kristjánsson vippaði naumlega yfir Keflavíkurmarkið á 9. mínútu en á 23. mínútu varði Ómar Jóhannsson vel í Keflavíkurmarkinu eftir fínt skot frá Grétari Hjartarsyni. Ómar átti góðan dag í Keflavíkurmarkinu í kvöld og varði á köflum vel fyrir sína menn.

 

Á 40. mínútu fyrri hálfleiks var brotið á Magnúsi Þorsteinssyni í vítateignum og dæmdi Egill Már Markússon vítaspyrnu við kröftug mótmæli KR. Dómurinn stóð og Guðmundur Steinarsson fór með knöttinn á punktinn. Spyrnan var föst og örugg og hafnaði neðarlega í vinstra horninu og staðan 1-0 Keflavík í vil en þannig stóðu leikar í hálfleik.

 

Heimamenn komu grimmir til síðari hálfleiks og pressuðu stíft á Keflvíkinga. Pétur Marteinsson átti fína bakfallsspyrnu fyrir KR í upphafi síðari hálfleiks en knötturinn fór rétt yfir markið. Keflvíkingar telfdu oft á tæpasta vaði og töpuðu oft boltanum á hættulegum stöðum á vellinum en náðu ávallt að bægja hættunni frá þegar KR gerðu sig líklega við markið.

 

Sóknir KR þyngdust með hverri mínútu á meðan Keflvíkingar beittu skyndisóknum og upp úr einni slíkri kom annað mark Keflavíkur. Marco Kotilainen brunaði upp hægri kantinn og sendi boltann fyrir markið. Þar var Símun Samuelsen mættur með góða viðtöku og skoraði með föstu skoti úr teignum yfir Kristján Finnbogason í markinu. Staðan 2-0 Keflvíkingum í vil í blíðviðrinu í Vesturbænum í kvöld.

 

Eftir annað mark Keflavíkur datt nokkur broddur úr leiknum en heimamenn minnkuðu muninn með skallamarki frá Björgólfi Takefusa á 82. mínútu.

 

Um fjórum mínútum var bætt við venjulegan leiktíma svo Ingvi Rafn fékk að spreyta sig í um 10 mínútur og virkaði hann í þokkalegu standi en hann fór sér að engu óðslega hjá Keflvíkingum heldur komst vel frá sínu eftir tveggja ára fjarveru frá boltanum.

 

Keflvíkingar stóðust áhlaup KR og fóru því með stigin þrjú úr Vesturbænum og fögnuðu vel og innilega í leikslok. Keflvíkingar leystu vel úr sínum málum í kvöld þar sem miðverðina Guðmund Mete og Kenneth Gustafsson vantaði í liðið en báðir leikmennirnir glíma við meiðsli en eru væntanlegir í hópinn á næstu dögum. Þeir Guðjón Árni, Hallgrímur, Nicolai og Branislav stóðu vaktina vel í Keflavíkurvörninni í kvöld en sigurinn var vafalítið sigur liðsheildarinnar.

 

Næsti leikur Keflavíkur er sunnudaginn 20. maí þegar þeir fá Íslandsmeistara FH í heimsókn á Keflavíkurvöll og hefst leikurinn kl. 20:00.

 

Byrjunarlið Keflavíkur:

Ómar Jóhannsson, Guðjón Árni Antoníusson, Jónas Guðni Sævarsson, Nicolai Jörgensen, Magnús Sverrir Þorsteinsson, Símun Eiler Samuelsen, Baldur Sigurðsson, Marco Kotilainen, Hallgrímur Jónasson og Branislav Milicevic.

 

Byrjunarlið KR:

Kristján Finnbogason, Gunnlaugur Jónsson, Kristinn Magnússon, Bjarnólfur Lárusson, Ágúst Þór Gylfason, Atli Jóhannsson, Björgólfur Takefusa, Grétar Ólafur Hjartarson, Pétur Hafliði Marteinsson, Sigmundur Kristjánsson og Skúli Jón Friðgeirsson.

 

VF-myndir/ [email protected] - Á efri myndinni er Ingvi í boltabaráttunni ásamt Guðmundi Steinarssyni en á neðri myndinni sést hvar Keflvíkingar fagna innilega í leikslok.