Toppleikur hjá toppliði Njarðvíkur
Njarðvíkingar verma efsta sæti Iceland Express deildarinnar í körfuknattleik ásamt Stjörnunni þegar fimm umferðir eru búnar. Í kvöld mættust Njarðvík og Íslandsmeistarar KR í hörkuleik í Ljónagryfjunni, sem lauk með sigri Njarðvíkinga 76-68.
Guðmundur Jónsson var stigahæsti maður leiksins með 21 stig og 7 fráköst í liði Njarðvíkur. Hjá KR var Semaj Inge með 20 stig og 8 stoðsendingar.
Sigurður Ingimundarson, þjálfari Njarðvíkur, var ánægður með sína menn í leikslok, þrátt fyrir hremmingar á vellinum. Fyrri hálfleikurinn var jafn og spennandi og hálfleikstölurnar 41-41. KR-ingar náðu hins vegar tíu stiga forskoti fljótlega í þriðja leikhluta og Njarðvíkingar skoruðu ekki stig í um fimm mínútur og voru raunar fram undir miðjan fjórða leikhluta á ná vopnunum til baka. Af mikilli elju náðu Njarðvíkingar að koma sér í góða stöðu á sama tíma og KR-ingar voru orðnir taugatrekktir og pirraðir.
76-68 sigur Njarðvíkur var sanngjarn og var heimamönnum klappað lof í lófa í leikslok, enda liðið veriða að gera góða hluti undir stjórn Sigurðar Ingimundarsonar á þessu hausti. Þá lofar leikurinn góðu fyrir næstu viðureign Njarðvíkur og KR sem verður á föstudaginn í Njarðvík í Bikarnum.
Myndband úr leiknum ásamt viðtali kemur á vf.is í fyrramálið.
Guðmundur Jónsson var sjóðheitur í kvöld og setti niður 21 stig fyrir heimamenn í Njarðvík.
Leikurinn í kvöld var átakaleikur frá fyrstu mínútu og áferðin á leiknum var eins og í úrslitakeppninni en ekki 1. nóvember 2009.
Magnús Gunnarsson kominn upp í skot í leiknum í kvöld.
„Ekki benda á mig“.
Víkurfréttamyndir: Hilmar Bragi Bárðarson
