Titilvörnin hófst á sigri

Keflavíkurstúlkur lögðu ÍS í fyrsta leik tímabilsins í Icelandic Express deild kvenna í körfuknattleik. Leik kvöldsins lauk með 16 stiga sigri Keflavíkur 61-77 í íþróttahúsi Kennaraháskóa Íslands. Titilvörn Keflavíkurstúlkna hófst því á sigri en fyrr í dag var þeim spáð Íslandsmeistaratitlinum að nýju, gangi sú spá eftir verður það í fjórða sinn á jafn mörgum árum sem Keflavík verður Íslandsmeistari í kvennakörfu.

„Þetta var góður sigur en ekkert sérstakur leikur. Við náðum strax forskoti en svo gætti full mikils kæruleysis hjá okkur. Við pressuðum stíft á ÍS í kvöld en sóknarleikurinn var frekar dapur og við vorum oft að henda boltanum klaufalega frá okkur. Við eigum mikið inni,“ sagði Sverrir Þór Sverrisson, þjálfari Keflavíkurkvenna, í samtali við Víkurfréttir í kvöld.

Keflavík mætir KR í næstu umferð Iceland Express deildarinnar en sá leikur fer fram í Sláturhúsinu að sunnubraut miðvikudaginn 19. október kl. 19:15.

„KR liðið á eftir að styrkjast mikið þrátt fyrir að þeim hafi verið spáð falli í dag, þær eiga von á tveimur Evrópuleikmönnum og einum kana og þær verða sterkar,“ sagði Sverrir að lokum.