Þróttarar leita eftirmanns Brynjars

Í tilkynningu frá knattspyrnufélaginu Þrótti Vogum kemur fram að Brynjar Þór Gestsson, þjálfari karlaliðsins í knattspyrnu hefur sagt upp sem þjálfari liðsins. Brynjar var einnig yfirþjálfari barna og unglingastarfs Þróttar.

„Það er sam­dóma álit stjórn­ar UMFÞ og Knattspyrnudeildar UMFÞ að Brynjar hafi sinnt starfi sínu vel og sam­starf við hann inn­an fé­lags verið til mik­ill­ar fyr­ir­mynd­ar. Þróttur Vogum kann hon­um mikl­ar þakk­ir fyr­ir sitt fram­lag til knattspyrnunnar í Vogum og ósk­ar hon­um og hans fjölskyldu alls hins besta í framtíðinni.“ Þetta kemur fram í fréttatilkynningunni.

Þróttur komst upp í aðra deildina í sumar í fyrsta sinn í sögu félagsins en félagið fagnar 85 ára afmæli í haust. 

„Stjórn knattspyrnudeildar ætlar að leggja áherslu á að halda þeim leikmönnum sem fyrir eru hjá félaginu og hefur framkvæmdastjóra Þróttar verið falið að leita eftirmanns Brynjars og mun sú vinna hefjast á næstu dögum.“ 

Fyrir hönd Þróttar, Baldvin Hróar formaður UMFÞ og Friðrik V.  formaður knd. UMFÞ.