Þróttarar ætla í Höllina

Þróttur Vogum eygir ennþá von um að komast í bikarúrslitin í handbolta. Liðið leikur gegn Fram í 16-liða úrslitum bikarsins n.k. laugardag í íþróttahúsinu við Strandgötu í Hafnarfirði.

Þróttarar fóru létt í gegnum 32-liða úrslitin með öruggum sigri á KR. Framarar eru að gera góða hluti í Olísdeildinni. Eru í 3. sæti deildarinnar og gerðu jafntefli í síðasta leik á móti Akureyri.

Fyrrverandi landsliðskempurnar hjá Þrótti Vogum ætla sér ekkert annað en sigur og vilja Þróttarar hvetja alla áhugamenn um handbolta að mæta og taka þátt í þessum stórviðburði.

„Fyrst og fremst hvetjum við alla Vogabúa til að fjölmenna á leikinn og styðja félagið sitt og taka þátt í þessari gleði,“ segir í viðburði á facebook-síðu Þróttara.