Teitur tekur ekki við Njarðvík

Óljóst er hver tekur við þjálfun Njarðvíkinga í körfuboltanum eftir að Friðrik Ingi Rúnarsson lét af störfum á dögunum. Teitur Örlygsson aðstoðarþjálfari liðsins hefur nú tekið af allan vafa og hefur lýst því yfir að hann muni taka sér pásu á næsta ári og hyggst ekki starfa við þjálfun. Í samtali við Karfan.is sagði Teitur að hann ætlaði sér að sitja í stúkunni næsta tímabil og hvetja Njarðvíkinga þaðan. Friðrik Ingi sagði sjálfur á samfélagsmiðlum að hann væri ekki hættur þjálfun þó svo að hann verði ekki áfram hjá Njarðvík.