Sporthúsið opnar formlega á Ásbrú

Sporthúsið Reykjanesbæ opnar fyrir hádegi á morgun, laugardag. Þar var í dag verið að leggja lokahönd á glæsilega aðstöðu. Starfsemi verður hafin í stöðinni í fyrramálið, eftir formlega opnun klukkan 11. Ari Elíasson, einn eigenda stöðvarinnar sagði í samtali við Víkurfréttir mikið vera búið að ganga á undanfarna daga, og að árangurinn væri fram úr hans björtustu vonum. Ingi Páll Sigurðsson tók undir með Ara og lagði áherslu á að búið væri að ná þessum frábæra árangri á svo skömmum tíma þar sem allir hefðu lagst á eitt og unnið dag og nótt.

Iðnaðarmenn voru í öllum hornum að klára smáatriðin, en þeim fer fækkandi og í staðinn er mættur her fólks til þess að leggja lokahönd á þrifin. Verið er að prufukeyra hitakerfi í glæsilegum HotYoga sal, hljómflutningstæki í öðrum sal, hlaupabretti í tækjasalnum og setja saman barnadót í barnagæslunni, þannig að fjörið er mikið.

Eigendur Sporthússins Reykjanesbæ eru Suðurnesjafólkið og hjónin Ari og Eva Lind, ásamt bræðrunum Inga Páli og Þresti Jóni Sigurðssonum, eigendum Sporthússins í Kópavogi.

Ýmsa góða gesti bar að garði þegar undirbúningur stóð sem hæst í dag.