Spennuþrungin umferð í 1. deildinni í dag
Heil umferð fer fram í 1. deild karla í knattspyrnu í dag þar sem boðið verður frítt á leik Grindavíkur og Reynis á Grindavíkurvelli. Það er Sparisjóðurinn sem býður knattspyrnuáhugafólki á völlinn. Allir leikir umferðarinnar hefjast kl. 13.30 í dag en þetta er næst síðasta umferð deildarinnar.
Njarðvíkingar taka á móti Fjarðabyggð á Njarðvíkurvelli og þurfa bráðnauðsynlega á sigri að halda. Njarðvík er í þriðja neðsta sæti deildarinnar með 17 stig.
Ef Grindvíkingar ná einu stigi út úr leik dagsins þá hafa þeir tryggt sér sæti í Landsbankadeildinni að ári. Leikurinn er einnig gríðarlega þýðingarmikill fyrir Reynismenn sem hafa aðeins 16 stig í næst neðsta sæti en KA hefur 16 stig á botninum með slakara markahlutfall. KA leikur gegn Leikni í dag og eru mun líklegri til að ná sér í stig í dag því Sandgerðingar leika gegn toppliði Grindavíkur.
Leikir dagsins í 1. deild:
Þróttur R. – ÍBV
Grindavík – Reynir
Njarðvík – Fjarðabyggð
Víkingur Ó. – Stjarnan
KA – Leiknir
Fjölnir – Þór
VF-Mynd/ Paul McShane og félagar í Grindavík geta í dag tryggt sér sæti í Landsbankadeildinni.
