Sigurður: Okkur vantar enn stöðugleika

Keflvíkingar eru komnir á topp Iceland Express deildar karla í körfuknattleik eftir góðan 99-85 sigur á Þór Akureyri í Sláturhúsinu í Keflavík. Staðan var 50-46 Keflavík í vil í hálfleik en í þeim síðari réðu heimamenn lögum og lofum og höfðu öruggan sigur. Keflavík vann þriðja leikhlutann 37-15 og þar með var björninn unninn. Sigurður Ingimundarson þjálfari Keflavíkur var sáttur við sigurinn en sagði að meiri stöðugleika vantaði í Keflavíkurliðið.

 

,,Við lékum mjög vel í þriðja leikhluta og þar kláraðist leikurinn. Það er lítið búið af mótinu en brátt kemur smá mynd á þetta og fljótlega upp úr þessum fyrstu umferðum fara menn að líta á stöðutöfluna,” sagði Sigurður í samtali við Víkurfréttir.

 

,,Okkar tímabil í fyrra var ekki gott þar sem við höfðum verið í fjögur ár í Evrópukeppnunum en nú er svona aukakeppni ekki að trufla okkur. Þrátt fyrir það höfum við ekki verið að spila þessa síðustu leiki frábærlega, það hafa komið frábærir kaflar í okkar leik og svo hræðilegir kaflar svo það vantar enn stöðugleika í liðið. Þegar stöðugleikinn verður kominn þá verður þetta þægilegra,” sagði Sigurður en hann kvaðst sáttur við framlag Gunnars Einarssonar í kvöld sem gerði 21 stig fyrir Keflavík, tók 3 fráköst og stal 3 boltum. Hjá Þór var Luka Marolt atkvæðamestur með 32 stig og 8 fráköst.

 

Keflvíkingar mæta svo grönnum sínum úr Njarðvík í hörkuslag á sunnudag í Ljónagryfjunni kl. 19:15. ,,Við bíðum bara spenntir eftir leiknum gegn Njarðvík og það verður bara flottur leikur,” sagði Sigurður en Njarðvíkingar mæta bikarmeisturum ÍR í Ljónagryfjunni annað kvöld kl. 19:15.

 

Tölfræðin úr leik Keflavíkur og Þórs í kvöld

 

VF-Mynd/ Úr safni - Sigurður Ingimundarson