Sayman leikur með Njarðvík í vetur

Körfuknattleiksdeild Njarðvíkur hefur gengið frá samningum við 22 ára bandarískan leikstjórnanda, Matt Sayman sem mun leika með liðinu á komandi leiktíð.

Þar með eru þeir komnir með fullskipaðan leikmannahóp fyrir næstu leiktíð og segir Einar Árni Jóhansson að mikil samkeppni verði um leiktíma í öllum stöðum.

Sayman er 193sm á hæð og var m.a. fyrirliði liðs Baylor-háskóla á sínu síðasta ári. „Hann er ekki þessi skytta eins og Brandon Woudstra sem var hjá okkur í fyrra,“ sagði Einar Árni. „Hans styrkleiki er fyrst og fremst leikskilningurinn og að finna meðspilarana.“

Sayman er væntanlegur til landsins í byrjun september og fer með liðinu til Danmerkur í æfingaferð nokkru síðar. „Hann hlakkar mikið til að koma,“ segir Einar að lokum og bætir því við að hann sé ánægður með þetta góða tækifæri.