Rennblautt jafntefli í Grindavík

Grindavík og Stjarnan skildu jöfn í fyrstu umferð Pepsi-deildar karla í knattspyrnu. Leikurinn fór fram í Grindavík í kvöld við rennblautar aðstæður.

 

Leikurinn fór rólega af stað en það var ekki fyrr en á 30. mínútu að fyrsta markið kom eftir vítaspyrnu sem Grindvíkingar fengu þegar brotið var á Andra Rúnari Bjarnasyni. Alexander V. Þórarinsson skoraði örugglega úr spyrnunni.

 

Baldur Sigurðsson, gamli KR-ingurinn, Keflvíkingurinn og Mývetningurinn, jafnaði svo leikinn fyrir Stjörnuna 11 mínútum síðar. 

 

Magnús Björvinsson skoraði svo stórkostlegt mark á loka mínútu fyrri hálfleiks. Hann bombaði á markið af löngu færi og boltinn strauk þverslánna á leið sinni inn í markið. Magnús fékk góða aðstoð frá veðurguðunum í þessu skoti sem var óverjandi.

 

Síðari hálfleikur einkenndist af því að veðrið lék stóran þátt í leiknum. Það var ekki fyrr en undir lok leiksins að Daníel Laxdal náði að jafna leikinn fyrir Stjörnuna og í kjölfar jöfnunarmarksins reyndu gestirnir allt hvað þeir gátu til að skora sigurmark. Það tókst ekki þrátt fyrir harða sókn og úrslitin í Grindavík því jafntefli, 2:2.