Pétur þjálfar Grindavíkurstúlkur

Pétur Guðmundsson var í gærkvöldi ráðinn þjálfari kvennaliðs Grindavíkur. Segir í tilkynningu á vef UMFG að þetta séu mikil gleðitíðindi fyrir grindvískan kvennabolta, en stúlkurnar hömpuðu bikarmeistaratitlinum í vetur. 

Pétur er flestum hnútum kunnugur hjá Grindavík því hann lék með þeim allan sinn meistaraflokksferil utan eins árs. Þá hefur hann verið aðstoðarþjálfari Friðriks Ragnarssonar hjá karlaliðinu síðustu 2 ár.

Í tilkynningunni á www.umfg.is segir að stjórn körfuknattleiskdeildarinnar bjóði hann velkominn til starfa og að mikils sé vænst af starfi hans.

Pétur hyggst aðeins tefla fram einum erlendum leikmanni á næsta ári og vill hann fá Tiffany Roberson aftur til liðsins ef það er mögulegt, en hún lék stórkostlega með liðinu á nýliðinni leiktíð.

Varðandi frekari viðbætur í hópinn segist hann bera traust til núverandi leikmanna liðsins að keppa um alla titla en segist jafnframt ekki slá hendinni á móti því ef nýjir leikmenn vilji bætast í hópinn.

VF-mynd/Þorgils - Pétur í kveðjuleik sínum með Grindavík í fyrravor