Páll valinn bestur á lokahófi Þróttar -myndir

Lokahóf meistaraflokks Þróttar Vogum var haldið á laugardaginn með pomp og prakt í Tjarnarsalnum. Verðlaun voru veitt þeim leikmönnum sem þóttu skara frammúr með einum eða öðrum hætti og þá var stuðningsmaður ársins einnig heiðraður.

Mikil og góð stemmning var í hófinu og félagið að fagna því að hafa tryggt sér sæti deild ofar í fyrsta sinn í sögu félagsins á dögunum. Á meðal skemmtiatriða má nefna að Þorvaldur Örn kom og tók lagið fyrir sveitunga sína, Ari Eldjárn mætti á svæðið og tryllti liðið úr hlátri á sinn einstaka hátt og þá má ekki gleyma trúbadorunum Ívari og Magnúsi Hafdal sem mættu á svæðið og sungu fagra tóna.

Eftir verðlaunaafhendingu voru birtar myndir á risaskjá frá árunum 2008 - 2013 og var lagið „Farin“ með Skítamóral spilað undir. Voru Þróttarar að kveðja 4. deildina með formlegum hætti og um leið að þakka öllum þeim leikmönnum sem tóku þátt í þessu ferðalagi með þeim.

Hinar margfrægu grænu buxur aðstoðarþjálfara liðsins voru boðnar upp ásamt treyju fyrirliðan og þá fór á uppboð Þróttaratreyja sem Katrín Jónsdóttir fyrrverandi landsliðskona áritaði fyrir sinn síðasta landsleik á móti Sviss árið 2013. Rann allur ágóðinn til kvennaknattspyrnunnar í Vogum fyrir þá treyju.

Rúnar Arnarsson stjórnarmaður KSÍ hélt stutta tölu fyrir viðstadda og óskaði Þrótti til hamingju með árangurinn. Veislustjórn var í öruggum höndum Magnúsar Björgvinssonar sem að þótti sýna mikla lipurð. 

Verðlaun er veitt voru á lokahófi Þróttar Vogum

Besti leikmaður: Páll Guðmundsson

Mikilvægasti leikmaður: Páll Guðmundsson

Markakóngur: Andri Gíslason
Fallegasta markið: Andri Gíslason
Besti félaginn: Davíð Arthur
Besti leikmaður að mati stuðningsmanna:  Halldór Hilmisson

Stuðningsmaður ársins: Reynir Brynjólfsson

Reynir Brynjólfsson hlaut útnefninguna „stuðningsmaður ársins“ og þótti vel að því kominn