Ómar ekki með Keflvíkingum í sumar

Markvörðurinn Ómar Jóhannsson mun ekki leika með Keflvíkingum í Pepsi-deildinni í fótbolta í sumar. Ómar hefur verið að glíma við þrálát axlarmeiðsli sem héldu honum frá keppni síðastliðið sumar og ljóst er að þau munu koma í veg fyrir þátttöku hans í sumar. Vefsíðan Fótbolti.net greindi frá þessu í dag.

„Það eru einhverjar skemmdir í beini sem þýða að þarf að fara í aðgerð einu sinni enn og þá stærri aðgerð en ég hef farið í áður,“ sagði Ómar í samtali við vefsíðuna í dag. „Sérfræðingar hafa sagt mér að ég megi láta reyna á þetta en þegar maður hefur farið oft úr axlarlið þá er takmarkað hvað maður getur staðið lengi í því.“

Ómar er 32 ára gamall en hann hefur verið markvörður Keflvíkinga undanfarin ár. Þrátt fyrir þetta bakslag segist hann hvergi nærri hættur.

„Þetta er engin dramatík. Ég er ekki hættur í fótbolta en ég hef fengið leyfi hjá Keflavík til að stíga frá liðinu í bili og skoða önnur verkefni,“ sagði Ómar sem ætlar sér að koma að fótboltanum í sumar. Hann er að þjálfa yngri flokka hjá félaginu og segist geta hugsað sér að koma að markmannsþjálfun hjá meistaraflokknum.