Ólafur Örn yfirgefur Grindavík
Knattspyrnumaðurinn Ólafur Örn Bjarnason hefur yfirgefið herbúðir Grindavíkur og hefur gengið frá starfslokum sínum við félagið. Ólafur Örn var fyrirliði Grindavíkur sem féll í sumar úr Pepsi-deildinni og leikur því í 1. deildinni á næstu leiktíð.
Þetta kemur fram á vefmiðlinum 433.is þar sem Ólafur Garðarsson, umboðsmaður Ólafs, staðfestir brotthvarf miðvarðarins frá Grindavík. Ólafur kom aftur til Grindavíkur um mitt sumar 2010, eftir að hafa leikið í nokkur á með Brann í Noregi, og var spilandi þjálfari liðsins allt þar til síðasta haust þegar Guðjón Þórðarson var ráðinn til starfa.
Í frétt 433.is segir að hinn 37 ára gamli Ólafur Örn ætli að flytjast á höfuðborgarsvæðið og ætli að halda áfram að spila fótbolta en hann hefur spilað allan sinn feril á Íslandi með Grindavík og er næstleikjahæsti leikmaður félagsins í efstu deild.
